Өлкөдөгү 453 айыл өкмөткө кызматтык жаңы унааларды сатып алуу сунушталды

Жогорку Кеңештин 15-февралындагы жыйынында депутат Сайдулла Нышанов өлкө аймагындагы 453 айыл өкмөткө кызматтык жаңы унааларды сатып алуу керектигин айтып чыкты. Анын билдиришинче, айыл өкмөттөрдөгү кызматтык унаалардын эскилиги жетип, жылына ар бирине 70 миң сомдун тегерегинде акча сарпталат.

"Айыл өкмөттөрдөгү кызматтык унаалардын эскилиги жетиптир. Ар бир айыл өкмөт жылына кызматтык унаага 70 миң сомдон коротуп оңдотот экен. Бирок ал да жетпей жатыптыр. "Өкмөт уруксат берсе, оңдоого кеткен каражатты топтоп жана башка мүмкүнчүлүктөрдү таап, өзүбүз эле Орусиядан чыккан Нива үлгүсүндөгү унааларга алмаштырып алат элек" деп кайрылып жатышат. Өкмөт ушул маселени карап чыгышы керек. Техника жок болсо аймактарда иш жүрбөйт", - деди Нышанов.

Депутаттын сунушу Жогорку Кеңештин жазгы талаа иштери боюнча кабыл алган токтомуна тапшырма катары киргизилди.