Депутаттар "батпай калат экенбиз" деп ЖЭБдин 386 миллион долларга курулган бөлүгүнө журналисттер менен чогуу киришкен жок

Бүгүн, 16-февралда Бишкек жылуулук электр борборунда Жогорку Кеңештин депутаттык комиссиясынын көчмө жыйыны өтүүдө.

Анын жүрүшүндө ЖЭБдин 386 миллион долларга курулган бөлүгүнө барышканда, депутаттар жыйынды журналисттердин катышуусуз улантууну туура көрүштү. Мындай кадамын алар ичине бардыгы батпай калуу мүмкүндүгү менен түшүндүрүштү. Эл өкүлдөрү журналисттерге толук маалыматты тактап, түштөн кийин саат 14:00дө берерин убадалашты. Ошентип депутаттар 386 миллион долларга курулган бөлүккө өздөрү киришти.

Эске салсак, 26-январда Бишкек ЖЭБинде авария болуп, шаардагы үйлөргө берилген жылуулук 7 күнгө төмөндөгөн. 386 миллион долларлык ЖЭБдин курулушу, ЖЭБдеги авария, өкмөттүн күз-кыш мезгилине даярдыгын иликтеп чыгуу боюнча парламентте депутаттык комиссия түзүлгөн.

Депутаттык комиссиянын курамына төмөнкүлөр кирет:

"Өнүгүү-Прогресс" фракциясынан Исхак Масалиев,

КСДП фракциясынан Төрөбай Зулпукаров, Данияр Аттокуров, Аида Касымалиева, Улан Примов, Аалы Карашев,

"Бир Бол" фракциясынан Мыктыбек Абдылдаев,

"Ата Мекен" фракциясынан Сайдулла Нышанов.

"Республика-Ата Журт" фракциясынан Айбек Алтынбеков, Акылбек Жамангулов, Умбеталы Кыдыралиев,

"Кыргызстан" фракциясынан Исланбек Сарсейитов, Алмазбек Токторов.