Нарында таштанды ташталган жайдан бишкектик адамдын жансыз денеси табылды

Нарын шаарындагы таштанды ташталган жайдан бишкектик адамдын жансыз денеси табылды. Бул тууралуу Нарын ОИИБинин басма сөз кызматынан билдиришти.

Маалыматка ылайык, 14-февраль күнү саат 17:30дар чамасында таштанды төгүлгөн жердин чет жагынан жуурканга оролгон азиат түспөлүндөгү эркек кишинин жансыз денесин табышкан. Маркумга кароо жүргүзгөн учурда ал киши колдуу болуп өлтүрүлгөнү аныкталган.

"Бул факт боюнча 97-берене (адам өлтүрүү) менен кылмыш иши козголуп, каза болгон жаран Бишкек шаарынын Ак-Өргө жаңы конушунун 43 жаштагы Э.Ү. аттуу тургуну экени аныкталган. Көп өтпөй эле кылмыштын бети ачылып, шектүү катары Нарын районунун 32 жаштагы И.М. аттуу тургуну кармалды. Ал каза болгон адамдын жансыз денесин жашыруу максатында таштанды ташталган жайга алып барып таштап салган. Учурда шектүү Нарын ШИИБинин убактылуу кармоочу жайында кармалып турат", - деп билдиришти басма сөз кызматынан.

.