ЖЭБге жумшалган 386 миллион доллар насыяны Кыргыз аудиттери текшере турган түз норма жок

"ЖЭБге жумшалган 386 миллион доллар насыяны Кыргыз аудиттери текшере турган түз норма жок", - деди Өнөр жай, энергетика жана жер казынасын пайдалануу мамлекеттик комитетинин төрагасы Улан Рыскулов. Бул тууралуу ал бүгүн, 16-февралда Жогорку Кеңеште ЖЭБдеги авария боюнча түзүлгөн депутаттык комиссиянын жыйынында айтты. Депутат Мыктыбек Абдылдаев буга чейин эл аралык келишимдерди териштирүүдө маселе жаралганын жүйө келтирип, бул долбоорду кыргыз аудиттери териштирүүгө мүмкүнчүлүгү жетишине күмөнүн айтты.

"Ал жерде Кыргыз тараптын эсептөө палатасын киргизбейт. Бул жогорку Нарын каскадындай эле Кыргыз тараптын аудиттери кире алабы? Нарын каскадын текшергенде Орусиянын эле аудиттери кирген. Анткени келишимде ошондой норма бар болчу. Бишкек ЖЭБдин курулушу боюнча Кыргыз өкмөтү менен "Эксим Банк", "ТВЕА" менен эки келишим бар. Ошол жерде эки келишимде бар бекен, Кытай тарапты аудит кыла алабызбы?” - деп суроо салды Абдылдаев. Рыскулов ага жооп кылып "келишимде түз нормада жазылган эмес", - деди.

Мыктыбек Абдылдаев бул келишимде өлкөнүн кызыкчылыгына каршы келген учурлар көп экенин айтты.

"Акчаны кытай тарап өздөрү карап, эсептеп техникалык жабдыктарды сатып алып жиберип турган. Ал жабдыктар бажы салыктарынан да бошотулган. Ушундай келишимге Каржы министрлиги кол коюп жатат? Кана бул жерде Кыргыз мамлекетинин кызыкчылыгы? Бул жерде "ТВЕАнын" кызыкчылыгы каралгандай болуп жатат. Бул ЖЭБ боюнча маселе башында эле туура эмес башталган.

Кредиттик макулдашууда эл аралык норма бар. Биздин коопсуздук комитети бул иштин аягына кантип чыгарат? Чыгара албайт, мүмкүнчүлүгү жок. Жаңы Конституция, мыйзам менен саясий укук коргоо органдарынын укуктарынын баарын кыскартып салганбыз. Баарын АКС кызматына бергенбиз. Алар облустан алыс чыга албайт. Кытайга барыш үчүн эки өлкөнүн башкы прокурорлору сүйлөшүш керек. Кытайга суроо түшөрү менен ал жактын прокуратурасы дароо банкты да "ТВЕАны" да текшере баштайт. Алардын мыйзамын билебиз, атат же камайт", - деди Абдылдаев.

Ал эми Башкы прокурордун орун басары бул келишимде тоскоолдук жаратуучу норма жок экенин айтып, териштирүүнү аягына чыгарууга болгон мүмкүнчүлүктөр жумшаларын айтты.