Вице-премьер райондук социалдык өнүктүрүү башкармалыктарында чоң коррупциялык иштер бар экендигин айтты

Эмгек жана социалдык өнүктүрүү министрлиги 16-февралда 2017-жылдагы ишинин жыйынтыктары жана 2018-жылга коюлган милдеттери боюнча коллегиялык кеңешмесин өткөрдү. Министрдин орун басары Жылдыз Полотова маалымат берип жатып бүгүнкү күндө экономикалык кыйынчылыктарга карабастан мамлекет тарабынан кепилдик берилген социалдык төлөмдөр толук көлөмдө төлөнүп жатканын белгиледи. Анын айтымында, 2018-жылдын 1-январына карата жөлөк пул жана компенсация түрүндөгү социалдык төлөмдөрдү 470 миңден ашуун адам алды.

Жыйынга катышкан вице-премьер-министр Чолпон Султанбекова райондук социалдык өнүктүрүү башкармалыгынын жетекчилерин жөлөк пул алгандардын саны жогорулагандыгына байланыштуу сынга алды. Ошондой эле райондук социалдык өнүктүрүү башкармалыктарында чоң коррупциялык иштер бар экендигин белгиледи.

"Сиздер айлык акыны жогорулатууну өтүнөсүздөр, ошол эле учурда төмөнкү айлык акылуу жумушка Жогорку Кеңештин депутаттары аркылуу орношосуздар. Сиздер айлык акынын төмөндүгүнө карабастан иш ордуңуздарды бошоткуңуздар келбейт. Анткени анда коррупциялык схемалар бар", - деди ал.