Ала-Арчада аскадан кулаган эки альпинисттин бири табылып, ооруканага жеткирилди

Чүй облусунда жайгашкан Ала-Арча улуттук паркында 15-февралда аскадан кулап кеткен эки альпинисттин бирөө табылып, ооруканага жеткирилди. Бул тууралуу Өзгөчө кырдаалдар министрлигинин басма сөз кызматынан кабарлашты.

Маалыматка ылайык, 15-февраль күнү Ала-Арча коругундагы Рацек хижинасынын жанындагы аскадан 2 альпинист, Литванын жарандары Сайкаускас Салиюс менен Кейскас Крупский Алис саякаттап жүрүп, кулап кеткен. Аларды издөө иштери 16-февралда башталган.

Башкы штабдан тартылган тик учактын жана министрликтин куткаруучуларынын жардамы менен Кейскас Крупский Алис оң бутунан жаракат алган абалда табылып, Бишкектеги менчик клиникага жаткырылды. Ал эми экинчи альпинисттин абалы боюнча маалымат жок. Аны издеп-куткаруу иштерине 9 куткаруучу тартылган.