Эми Өзбекстанда медайымдар бейтаптарга велосипед менен барып, медициналык жардам көрсөтө башташат

Эми Өзбекстанда медайымдар бейтаптарга велосипед менен барып, медициналык жардам көрсөтө башташат. Бул тууралуу өзбек басылмалары жазып чыгышты.

Маалыматка караганда, бул аракеттер жарандарды ыкчам медициналык биринчи жардам менен камсыз кылууга багытталган.

"Ташкент облусуна караштуу Куйичирчик райондук ооруканасы бейтаптарга биринчи ыкчам медициналык жардам көрсөтүү максатында "Велосипедчен медайымдын колдоосу" кызматын уюштурган. Колдоочу медайымдын жумушун жакшыртуу үчүн аталган райондун жергиликтүү бийлигинен 22 велосипед бөлүнүп берилди. Учурда 81 колдоочу медайым райондо жашап жаткан 104 миң 248 жаранды тейлеп жатат", - деп жазылат маалыматта.

Медайымдардын билдирүүсүндө, колдоочу кызматындагы жаңы шарттар менен бир топ убакыт үнөмдөлүп жатат. Мурда бир чакырууга бир жарым саат убакыт кетсе, азыр жалпысынан бейтапка жардам көрсөтүү убактысы 35 мүнөттү түзүүдө.

Расмий маалыматтарга ылайык, алгач велосипед менен ыкчам медициналык колдоо көрсөтүү Улуу Британияда 2000-жылы ишке ашкан. Анда жүргүзүлгөн изилдөөнүн негизинде велосипед "Тез жардам" унаасынан бейтаптарга убактысы боюнча бат жеткени 88 пайызды түзгөн. Андан сырткары велосипед менен жардам көрсөтүү кызматында акча каражаты да үнөмдөлгөн.