Жогорку Кеңештин V чакырылышынын депутаты Жусупали Исаев жол кырсыгынан каза болду

Жогорку Кеңештин V чакырылышында КСДП фракциясынан депутат болгон Жусупали Исаев жол кырсыгынан каза болду. Бул тууралуу SUPER.KG`ге Исаевдин жакын туугандарынын бири кабарлады.

Маалыматка ылайык, 18-февралга караган түндө Баткен облусунун аймагында жол кырсыгы катталып, анын кесепетинен Исаев каза болгон. Бул маалыматты Баткен ОИИБи да тастыктады. Учурда кырсыктын чоо-жайы, башка жабыркаган жарандардын бар-жогу боюнча маалыматтар такталууда.

Жусупали Исаев Жогорку Кеңешке чейин эки ирет Лейлек райондук кеңешинде, эки жолу Баткен облустук кеңешинде депутат болгон.

Жусупали Исаев 1955-жылы 10-февралда туулган. Анын артында 4 баласы калды.

SUPER.KG порталынын эмгек жамааты Жусупали Исаевдин көз жумганына байланыштуу үй-бүлөсүнүн, жакындарынын аза кайгысын тең бөлүшүп, терең кайгыруу менен көңүл айтат.