Жанар Акаев: "Балдарга жөлөк пул төлөп бере албай Дүйнөлүк көчмөндөр оюндарын өткөрүү туура эмес"

Бүгүн, 19-февралда Жогорку Кеңештин тийиштүү комитетинин жыйынында мугалимдердин жана дарыгерлердин пенсиясын жогорулатуу боюнча сунушталган мыйзам долбоору каралды.

Каржы министринин орун басары Улукбек Карымшаков бул мыйзам долбоорун ишке ашыруу үчүн бюджеттен кошумча 1 миллиард 140 миллион сом талап кылына турганын айтты.

Депутат Жанар Акаев өкмөт быйыл күздө өтө турган Дүйнөлүк көчмөндөр оюндарына канча каражат каралып жатканын сурады. Карымшаковдун айтымында, быйыл Дүйнөлүк көчмөндөр оюндарына өлкө казынасынан 306 миллион 700 миң сом каралган.

Депутат учурдагы каржы тартыштыгын негиз кылып, ошол каражатты социалдык кызматкерлердин абалын жакшыртуу үчүн жумшоо натыйжалуу боло турганын айтты.

"Шайлоочулар менен жолукканда эле жөлөк пул, пенсия жөнүндө сөз болот. Мугалимдердин айлыгы, студенттердин стипендиясы боюнча сунуштар өкмөттөн колдоо таппайт. Акча жок дейт. Бул азыркы өкмөт башчынын жүргүзгөн саясаты. Дайыма акча жок дейт. Дүйнөлүк көчмөндөр оюндарын өткөргөнү жатасыздар. Элибизди, жерибизди даңазалаган бул оюнду өткөрүүгө каршы эмеспиз. Бирок өкмөттө акча жок болуп, мугалимдерибиздин пенсиясын жогорулата албай, балдарыбыздын жөлөк пулун төлөй албай жатсак, кайыр сурап жүрүп ар эки жылда ошол оюнду өткөрүүнүн зарылдыгы барбы? Бул жагын өкмөт ойлонушу керек. Жок дегенде төрт жылда бир өткөрүү зарыл. Бул идеянын башында Түркия, Казакстан сыяктуу көчмөндөргө байланыштуу өлкөлөр эстафетаны бири-бирине берип өткөрмөк болгон. Биздин тышкы саясатыбыздын начардыгынан бир да мамлекет албай койду. Эми эки жыл сайын кайыр сурап отуруп өткөрөбүз деп жатабыз. Ошол акчанын баарын ушундай реалдуу иштерге, дарыгерлердин, мугалимдердин үй-жайына, айлыгына которсок болот эле. Кайыр сурап, насыя алып той өткөргөн туура эмес", - деди Акаев.