Кыргыз-Тажик чек арасындагы кырдаал боюнча Лейлек районунун акимине сөгүш жарыяланды

Баткен облусундагы Лейлек районунун акими Баймурат Бекмуратовго сөгүш жарыяланды. Тийиштүү буйрукка өкмөт башчы Сапар Исаков 14-февралда кол койгонун өкмөттүк аппараттан тастыкташты.

Маалым болгондой, акимге сөгүш жарыялоо 8-февраль күнү Кыргыз-Тажик чек арасындагы кырдаалды көзөмөлдөө боюнча жергиликтүү бийлик деңгээлинде чара көрүлбөгөнү себеп болгон.

Белгилей кетсек, 8-февралда Тажикстан "Кулунду" жана "Кайрагач" өткөрүү бекеттеринен адамдардын, унаалардын өтүүсүнө тыюу салган. Ошондой эле Лейлек районунун Сада айылындагы көпүрө аркылуу өтө турган жолду жаап, чек арачылардын санын көбөйткөн. Кечке жуук сүйлөшүүлөрдүн жыйынтыгында өткөрүү бекеттери жана жол ачылган.

Сада айылынын 75 окуучусу Кулунду айылындагы мектепке барып окуп келүү үчүн сайга курулган темир контейнер аркылуу өтүп келишкен. Ал контейнер облустук администрациянын тапшырмасы менен коюлган болчу. 9-февралда аким Тажикстандын Гафуров районунун акими менен сүйлөшүп, жыйынтыгында темир контейнерди алып, анын ордуна чакан көпүрөнү убактылуу орнотушкан.