Депутат Сабиров: "Быйыл Ысык-Көл облусундагы канализацияларды оңдоого 50 миллион доллар бөлүнөт"

Бүгүн, 21-февралда Жогорку Кеңештин жыйынында депутат Жанар Акаев канализация системи Ысык-Көл облусундагы эң чоң көйгөйлөрдүн бири экенин айтты.

"Чолпон-Атадагы, Балыкчыдагы, Тамчыдагы канализацияны оңдоо керек. Быйыл канализация системин оңдоого канча каражат бөлүндү?" - деп сурады Жанар Акаев.

"Республика-Ата Журт" фракциясынан депутат Максат Сабиров бул маселе боюнча Ысык-Көл облусундагы ыйгарым укуктуу өкүлү Узарбек Жылкыбаев менен сүйлөшүп келгендерин айтты. "Быйыл канализация системин оңдоого "Кумтөр" 50 миллион доллар бөлүп берет. Ысык-Көл районунан 4 айыл, Жети-Өгүз районунан 2 айылдын канализациясы оңдолот", - деди Сабиров.

Мындан тышкары Сабиров Ысык-Көлдөгү таштандылар жүрөгүн оорутуп жатканын кошумчалады. "Таштандылар жүрөгүмдү оорутуп жатат. Кудай буюрса, кагаз баштыктарды колдонуу боюнча мыйзам долбоору иштелип жатат", - дейт Сабиров.