Депутат Сабиров: "Ысык-Көлгө туристтердин келгенине сүйүнбөйм"

Бүгүн, 21-февралда Жогорку Кеңештин жыйынында Ысык-Көлдөн 300 метрден кем эмес аралыкка капиталдык курулушка тыюу салуу жөнүндө мыйзам долбоору каралды.

“Республика-Ата Журт” фракциясынан депутат Махабат Мавлянова дүйнөдө мейманканалар суунун үстүнө курулуп жатканын эскертип, мындай тыюу салууга каршы экенин билдирди.

Мыйзам долбоорунун демилгечиси Максат Сабиров: "Сиз Ысык-Көлдү океандарга, чоң мамлекеттерге салыштырып жатасыз. Биздин кичинекей көлүбүз бар. Касиеттүү Ысык-Көл деп бекеринен айтпайбыз. Ачыгын айтсам, Ысык-Көлгө туристтердин келгенине деле сүйүнбөйм. Кандай талкалануулар болуп жатат. Кышында барсаңыз көлдөн бөтөлкөлөр, баштыктар чыгып калат. Мынча турист келди деп айтабыз, бирок шарт түзүлгөн эмес. 300 метрден кем эмес аралыкка капиталдык курулушка тыюу салынбаса, 10 жылдан кийин көлдүн жээгине мейманканалар курулат. Ошондо ресторан, кафелер көлдү кандай булгай турганын көрүп, бармагыбызды тиштеп калбайлы", - деди Сабиров.