Өкмөт башчы Сапар Исаков "Ага-хан" өнүктүрүү тармагынын өкүлчүлүгүнүн башчысы менен жолугушту

Кыргыз Республикасынын премьер-министри Сапар Исаков Кыргыз Республикасындагы "Ага-хан" өнүктүрүү тармагынын өкүлчүлүгүнүн башчысы Шамш Кассим-Лакха менен жолугушту. Бул тууралуу Өкмөттүн басма сөз кызматы билдирди.

Маалыматка караганда, жолугушуунун жүрүшүндө Нарын шаарындагы жаңы мейманкананын, мектептин жана турак жайлардын курулушун, Бишкек шаарындагы Ботаникалык бакты биргелешип реконструкциялоону талкуулашкан. Мындан сырткары жакынкы мезгилдеги биргелешкен кызматташтыктын актуалдуу маселелери жана артыкчылыктуу багыттары талкууланган.

Өз кезегинде Шамш Кассим-Лакха, мамлекеттик органдардын ишин санариптештирүү, калкты ичүүчү таза суу менен камсыздоо жана ирригациялык тармактарды өнүктүрүү боюнча долбоорлордун ишке ашырылышы "Ага-хан" уюмунун артыкчылыктары менен дал келерин айткан. Ал мындан аркы ар кыл багыттагы конструктивдүү кызматташтыкка даярдыгын да билдирген.