Ош шаарына 7 миң жумуш орундуу тигүү фабрикасын куруу үчүн 25 гектар жер бөлүндү

Бүгүн, 21-февралда Ош шаарынын мэри Айтмамат Кадырбаев бир нече мекеме-ишканалардын жетекчилери менен биргеликте Ош шаарына текстиль фабрикасын куруу долбоорун ишке ашыруу максатында Кең-Сай айылына барды. Мэриядан кабарлашкандай, ал үчүн 25 гектар жер бөлүнүп берилген.

“Быйыл өлкө башчысы "Аймактарды өнүктүрүү жылы" деп жарыялап, “Жаңы доорго кырк кадам” долбоору кабыл алынды. Анын алкагында жумуш орундары менен камсыз кылуу боюнча иш алып баруу аракетинде инвесторлорду тартып жатабыз. “Кыргыз Текстиль ЛТД” ЖЧКсы тарабынан Ош шаарына текстиль фабрикасын куруу долбоорун ишке ашыруу максатында Кең-Сай массивинен 25 гектар жер бөлүп бердик. Бул кадам келечекте 7 миң жумуш оруну менен шаардыктарды камсыз кылат”, - деди Кадырбаев.

Ошондой эле тигүү фабрикасына кошумча жумушчуларга социалдык объектилер жана жатакана курула тургандыгы пландалууда.

Ага улай Кадырбаев Манас-Ата аймактык кеңешине барып, “ЖБИ-20” өндүрүш ишканасынын куруу пландары менен таанышты. “ЖБИ-20” өндүрүш ишканасынын жетекчиси Чыңгыз Исмаиловдун айтымында, бир жолку жука баштыктарды жана эт азыктарын кайра иштеп чыгаруучу фабрика болот. Ошондой эле ишкана Кыргыз-Орус өнүктүрүү фонду тарабынан каржылана тургандыгын кошумчалады.