Депутат Сабиров Жогорку Кеңештин Карамолдо Орозовдун 135 жылдык мааракесине байланыштуу токтому аткарылбай жатканын айтты

"Республика-Ата Журт" фракциясынан депутат Максат Сабиров Жогорку Кеңештин комузчу Карамолдо Орозовдун 135 жылдык мааракесине байланыштуу токтому аткарылбай жатканын айтты. Бул тууралуу ал бүгүн, 22-февралда парламенттин жыйынында билдирди.

"Быйыл залкар комузчу, көрүнүктүү композитор, Кыргыздын эӊ алгачкы эл артисти Карамолдо Орозовдун 135 жылдык мааракеси белгиленет. Ал тууралуу Жогорку Кеӊештин токтому кабыл алынган. Тилекке каршы, ал токтомдо камтылган иш-чаралар аткарылбай жатат. Жогорку Кеӊештин токтомуна ылайык, залкар комузчу туулган Ысык-Көл районундагы Корумду айылында анын ысымындагы маданият үйү курулуш керек болчу. Бирок азыркыга чейин курулбай турат. Андан башка дагы иш-чаралар аткарылган жок. Өкмөт бул маселени көзөмөлгө алууга тийиш", - деди Сабиров.