Карамушкина чет элдиктерге асыроого берилген балдар боюнча кылмыш ишин козгоону талап кылууда

Жогорку Кеңештин жыйынында КСДП фракциясынан депутат Ирина Карамушкина чет элдиктерге асыроого берилген балдар боюнча кылмыш ишин козгоону талап кылууда. Ал бул тармакта бир канча мыйзамсыз иштер бар экенин айтып, ага карата кылмыш ишин козгоого укук коргоо органдары жолтоо болуп жатканын билдирди.

"Мен балдар үйүндөгү балдардын жоголушу, кароосуз калган балдардын чет элдиктерге асыроого берилиши боюнча кылмыш ишин козгоону талап кылам. Чүй прокуратурасына УКМКдан кимдир бирөө телефон аркылуу чалып, кылмыш ишин ачууга жол бербей жатат. Бардык маалыматтар көрсөтүлүп, өткөрүлүп берилгенден кийин эмне үчүн Чүйдөгү балдар үйүнүн директорунун орун басары эле жумуштан бошотулуп калды? Балдардын кыймылы боюнча бардык аракеттерди жүргүзгөн негизги адамдар өз кызмат орундарында отурат. Эмне үчүн балдарды чет өлкөгө асыроого берген чет элдик уюмдун лицензиясы алынган жок? Аларды ким калкалап жатат?

Мен бүгүн Жогорку Кеңештин төрагасына жана тийиштүү комитетке кайрылып, депутаттык комиссия түзүүнү жана асыроого берилген балдарды, мамлекеттик жана менчик балдар үйлөрүндөгү өспүрүмдөр боюнча маселени териштирип чыгууну сунуштайм. Мен жалгыз алсыз болуп жатам", - деди Карамушкина.