1 тонна беш бармак жана 100 метр чучук "Ала-Тоо" аянтында жасалбайт

5-март - Ак калпак күнүнө карата 1 тонна беш бармак жана 100 метр чучук жасалып, өтө турган иш-чаранын кайсы жерде боло турганы азырынча белгисиз. Бул тууралуу бүгүн, 22-февралда SUPER.KG порталына аталган иш-чаранын уюштуруучуларынын бири Элнура Кулуева билдирди.

Кулуеванын айтымында, пландалган иш-чара өткөрүлөт, бирок учурда беш бармакты бышыра турган жай белгисиз.

"Биз Бишкек шаардык мэриясынын өкүлдөрү менен жолуктук. Алар "Ала-Тоо" аянтынын статусуна ылайык, 3-4 жылдан бери тамак-ашты даярдап, таратууга тыюу салынганын түшүндүрүштү. Аны биз туура эле кабыл алдык, анткени мыйзамды сыйлашыбыз керек. Биздин иш-чара шаардын тургундарына тоскоол болуп, ыңгайсыздыкты жаратпашы керек. Учурда алар сунуштаган жайларды кыдырып, таанышып жатабыз. Негизги максат бул улуттук баалуулуктарды даңазалоо менен "Гиннесстин рекорддор китебинин" тизмесине кирүү болгондуктан, тасма тартууга ылайыктуу жайды издеп жатабыз. Андан сырткары ал жерге 5 миң адам бата тургандай болуш керек", - дейт Кулуева.

Айта кетсек, өлкө аймагында 5-март - Ак калпак күнү 2016-жылдан бери расмий белгиленип келет.