Ошто Сириядагы согушка катышып келген 22 жаштагы жаран 5 жылга эркинен ажыратылды

Ош шаарында Сириядагы согушка катышып келген 22 жаштагы жаран 5 жылга күчөтүлгөн режимде эркинен ажыратылды. Бул тууралуу Ош облустук ички иштер башкармалыгынын басма сөз кызматкери Жанна Сатарбаева жогорудагы маалыматты SUPER.KG порталына тастыктады.

Анын айтуусуна караганда 22 жаштагы И.Эргашев Жалал-Абад облусунун Базар-Коргон районунда туулган. Ал 2017-жылдын ноябрь айында кармалып, 375-берене (куралдуу кагышка же согуш аракеттерине катышуу) боюнча кылмыш иши козголгон.

"Ал 2014-жылы сентябрда Орусиянын Москва шаары аркылуу Сирияга өтүп, ал жакта "Жавхат-ан-Нусра" аттуу террористтик топтун катарында согушкан. 2017-жылдын 17-ноябрында Түркиянын Стамбул шаарынан Бишкекке учуп келгенде аэропорттон кармалган. Болгон окуяны айтып берип, жасаган ишин моюнуна алган. Анын негизинде кылмыш иши козголгон. Кийин ал Ош облустук соту тарабынан 5 жылга күчөтүлгөн режимде эркинен ажыратылган", - дейт басма сөз катчы.

Ал эми УКМКнын маалыматына караганда, Сириядагы согушка катышуу үчүн 500дөн ашуун Кыргыз жараны кеткен.