Ал кайрадан төрөлдү. Денесинен 16 ийне табылган наристе ооруканада 1 жашка толду

Өзбекстандын жергиликтүү телеканалы денесинен 16 ийне табылган ымыркайдын абалы тууралуу видеоматериал даярдады.

Ташкент шаардык медициналык илим изилдөө борборунун дарыгери Хабибулла Акиловдун айтымында, Азизбектин абалын канааттандырарлык деп айтууга али көп бар. Бирок анын абалы күндөн-күнгө жакшырып жатат. Учурда ага жасалма дем алдыруучу аппарат дээрлик керектелбейт, көзүн ачып, эсине келип, бардык аракеттерге реакция кылат. Уйкусу жана дене табы жайында.

"11 айында Азизбекти өтө оор абалда алып келишти. Ал бир эмес, бир нече дарт менен жүргөн. Пневмания, моюн тараптары ириңдеп кеткен, ич көңдөйүндө, моюнунда, көкүрөгүндө денесинин көп жеринде ийнелер бар болчу. Табылган 16 ийненин 13үн алуу үчүн 9 сааттык операция жасалды. Бул балага физикалык жактан да, психологиялык жактан травма", - дейт дарыгер.

Ошондой эле ал 6-февралда Азизбек 1 жашка толгонун кошумчалаган. Дарыгерлер анын туулган күнүндө аны кайрадан төрөлдү деп куттукташкан. Эми ымыркайдын абалын мындан ары жакшыртуу үчүн бардык аракеттер көрүлөт жана кийинчерээк денесинде калган 3 ийне алынат. Азыр алар баланын өмүрүнө коркунуч жаратпайт.

Буга чейин Өзбекстандын Фергана облусунда дарыгерлер 11 айлык ымыркайдын денесинде 16 ийне бар экенин аныкташкан. Балага тез аранын ичинде операция жасалып, дарыгерлер ийнелер наристенин денесинде 1 айдан ашык убакыттан бери жүргөнүн билдиришкен. Ымыркайдын атасы Орусияга иштегени кеткендиги, ал эми апасы убактылуу өзүнүн ата-энесинин үйүндө жашап жатканы белгилүү болгон.