Таласта дарыгерлер Бишкектен хирург барганга чейин бычактан жаракат алган адамдын кан тамырын колдору менен 7 саат кармап туруп, өмүрүн сактап калышты

Бакай-Ата райондук ооруканасынын дарыгерлери Бишкектен хирург барганга чейин бычактан жаракат алган адамдын кан тамырын колдору менен 7 саат кармап туруп, өмүрүн сактап калышты. Бул тууралуу SUPER.KG порталына 23-февралда аталган оорукананын дарыгери Таалай Абдимуталипов билдирди.

Анын айтуусуна караганда, окуя 21-февралда болгон.

"Бизге 21-февралда саат 20:50лөр чамасында көкүрөгүнө курч нерсе менен жаракат алган 30 жаштагы тургунду алып келишти. Биз дароо аны текшерүүгө алып, хирургдардан; мен, кесиптешим Марип Ибраимов жана анестезиолог Жылдызбек Токтогулов үчөөбүз операция жасай баштадык. Бирок биз операция учурунда анын көкүрөгүнө сайылган курч нерсе өпкөсүн тешип өтүп, негизги чоң кан тамырды үзүп кеткенин көрдүк. Ал үзүлгөн кан тамырды улоого аракет кылдык. Бирок натыйжасыз болгондуктан Бишкектен атайын кан тамыр хирургун чакырууга аргасыз болдук. Ал түнкү саат 04:00дөн өтүп келди, ошол аралыкта биз кесиптешим экөөбүз, колубуз уюганда алмашып-алмашып үзүлгөн кан тамырды кармап турдук. Кийин ал келип, үзүлгөн кан тамырды улады", - дейт дарыгер.

Андан сырткары аталган жарандын өмүрүн сактап калууга Гүлбү Өмүрбекова жана Махабат Молдобекова аттуу медайымдар да көмөк көрсөткөнүн баса белгиледи.

Ошондой эле учурда операция жасалган жаран Бакай-Ата райондук ооруканасынын жандандыруу бөлүмүндө жатканын, абалы туруктуу, бирок оор экенин кошумчалады.