Дарыгер: "Дарылануу үчүн Индияга келген Баатыр Баназаровдо үмүттүн оту жанды, бирок каражат жетишсиз"

Рак илдетинен жабыркап бир көзүнөн, мурдунун бир бөлүгүнөн, үстүңкү эрининен ажыраган Баатыр Баназаровдун Индиянын Бангалор шаарына дарыланууга кеткендигин маалымдаганбыз. Бүгүнкү күндө ал Индиядагы клиникалардан толугу менен кароодон өтүп бүткөнүн бейтап менен кошо Индияга кеткен дарыгер Азамат Кошалиев билдирди.

Баназаровдун дарылануусуна жардам берип жүргөн, Улуттук онкологиялык борбордун дарыгер-ординатору Кошалиевдин айтымында, Баатыр Индиядагы 2 клиникадан кароодон өтүп, экөө тең анын жүзүн сактап калуу мүмкүн деген жоопту айткан.

"Биринчи клиника пластикалык операция, химиялык жана нур менен дарылоо ыкмасын сунуштап жатат. Бул процесстерден кийин ар бири 100 миң рупий (105 миң сом) турган дары каражатын ичет экен. Бирок алар сунуштаган дарылоо ыкмасы кымбатыраак болуп жатат. Азырынча так баа айтыла элек, операция татаал болгондуктан жалпы дарыланууга болжолдуу 60-70 миң доллар керек деп жатышат.

Экинчи клиника болсо рак клеткаларын тоңдуруу жолу менен дарылайт экен. Клеткалар тоңдурулган соң атайын ткандарды салышат, кийинчерээк кийип кайра чечип койсо боло турган силикон маска салып беришет. Мында адамдын жүзү серт көрүнүп калышы мүмкүн, бирок териси жабылат. Бул арзаныраак анан өтө кооптуу эмес дарылоо ыкмасы болот. Ага 15-20 миң доллардын тегерегинде акча керек болуп, дарылоого 2 айдай убакыт кетет экен. Биз экинчи клиниканын дарылоосун тандайлы деп жатабыз. Биринчи клиника сунуштаган операция өтө татаал болмок, анда бейтаптын өзүнүн сан эттери алынып бетине сөөктөр коюлуп жасалмак. Дарылоо убактысы 6 айга чейин созулмак. Бирок эки жак тең 100 пайыз кепилдик берген жок, биздин суранычыбыз менен дарылап көрөлү деп жатышат. Кыргыз жеринде Баназаровду дарылоого такыр шарттар жок эле бул жердин медицинасынын өнүккөнүн көрүп үмүт пайда болду", - деди ал.

Буга чейин маалымдалгандай, Баназаровдун оорусуна кайдыгер карабаган адамдардан 9 миң 300 доллар топтолгон. Анын миң доллары билетке жумшалган.

"Маселенин баары кайра эле акчага келип такалууда. Биз алып келген каражаттын жарымы медициналык текшерүүдөн өткөнгө, жашаганыбызга жумшалды. Барган клиникаларыбыздын баарынан эле арзандатууларды сурап жатабыз. Индиядагы мекендештер да кол кабыш кыла турганын айтып жатышат. 3-4 күндөн бери бир мекендешибиздин үйүндө конок болуп жатабыз.

Баатыр аганын болсо айыгып кетем деген үмүтү чоң, ооруганына да, кыйналганына да карабай жакшы маанай менен жүрөт. Биз кайра эле элдин жардамына муктажбыз, ошол эле учурда өкмөттөн да жардам сурап кетет элек", - деп кошумчалады Кошалиев.

Жардам көрсөтүүнү каалагандар үчүн Баатыр Баназаровдун апасы Саткын Баназарованын байланыш номери 0773 679 822.