Өкмөт калкты таза суу менен камсыз кылуу үчүн 43 миллион доллар насыя алууга ниеттенүүдө

Өкмөт калкты таза суу менен камсыз кылуу үчүн 43,2 миллион доллар насыя алууга ниеттенүүдө. Өкмөттүн сунушу бүгүн, 26-февралда Жогорку Кеңештин Бюджет жана финансы комитетинин жыйынында каралды. Бул каражат айыл аймактарындагы таза суу жана тазалык маселелерине керектелет.

Бул насыяны алуу боюнча долбоорго Эл аралык өнүктүрүү ассоциациясы менен Кыргыз тарап 2017-жылы 13-ноябрда кол койгон. 43,2 миллион доллардын 11,9 миллиону грант түрүндө, калган акча 38 жылдык мөөнөт менен насыя түрүндө берилип жатат. Бул долбоор 2025-жылга чейин ишке ашырылып бүтүшү керек.

Таза суу долбооруна Ош, Чүй, Ысык-Көл облусунун аймагындагы 53 айыл кирген. Бул долбоорго Кыргыз өкмөтү 7,2 миллион доллар каражат салат. Бул каражаттын булактары 2018-2019-2020-жылдарга өлкөнүн бюджетинен изделе турганы айтылды.