Улуттук банк уюлдук телефондун балансынан электрондук капчыктарды толтурууга тыюу салды

Улуттук банк уюлдук телефондун балансынан электрондук капчыктарды толтурууга тыюу салды. Бул тууралуу маалымат банктын расмий интернет баракчасына жарыяланды.

Кыргыз өлкөсүнүн Улуттук банкы электрондук акчалар жөнүндө жобого өзгөртүүлөрдү киргизди. Бул өзгөртүүлөр электрондук каражаттарды сактоодогу, капчыктарды толуктоодогу ар кандай мүчүлүштүктөрдүн алдын алууга жардам берет.

Жобого кирген өзгөрүүлөргө ылайык, мындан ары электрондук капчыктарды мобилдик абоненттин эсеби аркылуу толуктоого жана кайсы бир кызмат же товар үчүн төлөм жүргүзүүгө тыюу салат.

Электрондук капчыктарды банктагы эсеп аркылуу, банкта эсеп ачпастан акча которуу жана терминалдар аркылуу толуктаса болот.

Бул жободогу өзгөрүүлөр, токтом чыккан соң 15 күндөн кийин күчүнө кирет.

"Белгилей кетсек, буга чейинки иштеп жаткан бардык электрондук капчыктар жана ага байланышкан операциялар керектөөчүлөргө аталган токтом күчүнө кирмейинче иштей берет. Токтом күчүнө киргиче уюлдук байланыш операторлору электрондук капчыктардын ээлери жана балансында калган каражаттары менен тийиштүү иштерди алып барышы зарыл", - деп жазылган маалыматта.