АКШда каракчылардан кожоюнун коргоп жаткан итке 4 жолу ок тийди

АКШда ит ээсин каракчылардан коргоп жатып 4 ок жеди. Бул тууралуу чет элдик маалымат каражаттары жазып чыгышты.

Белгилүү болгондой, Вашингтон штатынын Де-Мойн шаарында Рекс аттуу немис овчаркасы ээсин каракчылардан коргоп жатып 4 ок жеген.

Рекстин 16 жаштагы кожоюну Хавьер Меркадонун айтымында, каракчылар алардын үйүнө кирип келгенде үйдө ити экөө эле болгон.

"Үйдүн ичинде отурганбыз, бир маалда терезеден бир адамдын карааны көрүндү. Рекс чуркап барып тынымсыз үрө баштады, андан соң каракчылардын бирин тиштеп алыптыр, а мен болсо атайын жардам чакырып, шкафтын ичине жашынып алгам. Каракчылар мен жашынып алган бөлмөгө киргенде Рекс аларды тиштеп алды. Ошондо алар итке 4 жолу ок чыгарышты", - деп билдирген Меркадо маалымат каражаттарына.

Ошондой эле ал окуя болгондон кийин ит өлүп калды деп ойлогонун, бирок мал доктурлардын өз учурунда жасаган операциясы иттин өмүрүн сактап калганга жардам бергенин кошумчалаган.

Окуя болгон жерге келген полиция кызматкерлери каракчыларды кармашкан, азыркы тапта иликтөө иштери жүрүп жатат.