Депутат Байпакбаев: “Өлкөдө эт, сүт таза болсо башка мамлекеттерде атаандаштык жарата алабыз”

“Республика-Ата Журт” фракциясынан депутат Экмат Байпакбаев өлкөдө эт, сүт таза болсо башка мамлекеттерде атаандаштык жаратуу оңой боло турганын айтты. Бул тууралуу ал бүгүн, 26-февралда Жогорку Кеңеште журналисттер менен жолугушканда билдирди.

Анын айтымында, айылдарда 6 айда соё турган малды укол сайып 3 айда бат эле семиртип алышат. “Бул ден соолукка зыян алып келет. Катуу чара көрүү зарыл. Жогорку Кеңеш жашыл экономика боюнча токтомду колдоп берди. Эми биз концепцияны даярдап жатабыз. Өкмөткө дагы тапшырма беребиз. Ал жакта атмосфера, унаалар, суу боюнча долбоорлор даярдалат. Эгерде өлкөдө экологиялык жактан таза азык-түлүк чыгарсак, эл кезекке өздөрү турат. Ошондой эле Ысык-Көлдөгү баштык, бөтөлкөлөрдү жок кылуу керек. Буларга тыюу салуу абзел. Ошондой эле Ысык-Көлдөгү канализация системин оңдоо зарыл. Көлүбүз таза болсо туристтер чакыртпай эле өздөрү келет”, - деди депутат.