ТИМ: "Алматы-Бишкек багытындагы жол кырсыгынан Кыргыз жараны каза болду"

Казакстандын Алматы облусунда бүгүн, 26-февралда Кыргыз жарандары катышкан жол кырсыгы катталды. Бул тууралуу ТИМдин басма сөз кызматы билдирди.

Берилген маалыматка ылайык, бүгүн саат 05:30дар чамасында Таргап айылында Кыргыз жарандары катышкан жол кырсыгы катталган. Алматы-Бишкек жолунда Тойота Эстима унаасы автобус менен кагылышып, айдоочу рулду башкара албай калган.

"Алдын ала айтылган маалыматтар боюнча, кырсыктан эки жаран каза болгон. Алар 1971-жылы туулган Сузак районунун тургуну М.С. жана Сузак районунун Октябрь айылында туулган, бирок Казакстандын жараны 1970-жылы туулган А.Г. болгон. Ал эми айдоочу Өзгөн районунун Кысык-Алма айылынын 38 жаштагы П.Ж. аттуу жараны", - деп айтылат маалыматта.

Унаада 6 жүргүнчү болуп, дагы үч жаран ар кандай жаракаттарды алышкан.

Буга чейин "Элдик кабар" рубрикасына бүгүн, 26-февралда Чымкенттен Краснодар шаарына бара жаткан автобус жол кырсыгына кабылганы, ичиндеги 55 жарандын 14ү Кыргыз жарандары экендиги маалымдалган.