Кыргыз депутаты Дамирбек Асылбек уулунун кармалышы боюнча кошумча маалыматтар белгилүү болду

Казакстанда Жогорку Кеңештин депутаты Дамирбек Асылбек уулунун кармалышы тууралуу кошумча маалыматтар белгилүү болду.

Казакстандык КТК телеканалы даярдаган репортажда аткезчилик боюнча айыпталып кармалган жарандардын сурак бергени көрсөтүлүүдө.

"Кылмыш дүйнөсүнүн авторитеттери чек арада көзөмөлдү өз карамагына алышкан. Аларга мыйзамдар, эрежелер, эл аралык келишимдер эч кандай күчкө ээ эмес. Авторитеттер ишкерлерге "салык" салып миллиондогон акча таап жатышкан", - деп маалымдалат репортажда.

Ал эми Дамирбек Асылбек уулу тууралуу айтылып жатып, ал аткезчилик менен алектенген кылмыш тобун жетектегени кабарланууда. "Кыргыз депутаты Алматыдагы ресторанда Бишкектен келген досу, жеке ишкер Уланбек Мурадилов менен отурган жеринен кармалган. Мурадиловду кармоо учурунда барсеткасынан атайын белги коюлган 92 миң доллар табылган. Тергөөнүн версиясы боюнча, бул акчаны ал жеке ишкерден аткезчилик жол менен товарды өткөрүп бергени үчүн алган. Алар менен чогуу казакстандык чек арачы отурган. Кыргыз депутаты жергиликтүү чек арачылар аркылуу каалаганын чек арадан өткөрүп келген", - дейт журналист.

Мындан тышкары репортажда Дамирбек Асылбек уулу Казак жарандыгын алып, туулган жерин өзгөрткөнү айтылууда. Ошондой эле анын аялы эки өлкөнүн жарандыгына ээ болгону айтылат.

Эске салсак, 19-февраль күнү Казакстандын Башкы прокуратурасы аталган өлкөнүн чек арага жакын аймагында контрабанда менен шугулданган уюшкан кылмыштуу топторго каршы аракетти күчөтүү, бажыга байланыштуу тармагындагы укукка каршы ишмердүүлүктү токтотуу максатында атайын операция жүргүзүлгөнүн билдирген. Жыйынтыгында 35 шектүү адам кармалып, анын ичинде 3 Кыргыз жараны бар. Анын бири - Жогорку Кеңештин депутаты Дамирбек Асылбек уулу экендиги тастыкталган. Кармалгандар Кытайдан Казакстанга, ошондой эле Кытайдан Кыргыз мамлекети аркылуу Казакстанга көмүскө схемалар жана жасалма документтер менен товар киргизүүгө шектелип жатышат.