ЖЫЛНААМА, 27-ФЕВРАЛЬ: Ырчы Бегимай Бекбоева туулган күнүнө сүйүктүүсү күмүш зер буюмун белек кылганын айтты

Бүгүн, 27-февралда ырчы Бегимай Бекбоева туулган күнүн белгилеп жатат. Туулган күндү белгилөөгө анчейин маани бербегенин айткан ырчы бүгүнкү күндөгү пландары менен бөлүштү.

"Буюрса, бүгүн 28 жашка толдум. Өзүм жаан-чачынды жакшы көргөндүктөн, бүгүнкү аба ырайы маанайымды ого бетер көтөрүп жатат. Негизи туулган күндү өткөрүүгө анчейин маани бербейм. Бирок түндө сааттын жебеси 12ни какканда жигитим белектерин көтөрүп келип куттуктап, жакшы маанай тартуулады. Мен көптөн бери күмүш зер буюмдарын жактырып, чогултуп жүргөм. Эрлан (ред. сүйүктүүсү) ошолордун катарын толуктап, жакшы күмүш топтомун белек кылды. Кечинде жигитим, сиңдим жана күйөө балам менен бирге чогулуп отуралы деп чечкенбиз. Азыр ошого даярданып жатам", - дейт ырчы.

Бегимай Бекбоева 1990-жылы 27-февралда Нарында туулган. Атасы Бекбоев Токторбек - обончу, аткаруучу. Апасы Кудайбергенова Жаңыл - актриса, куудул. Алгач сахнага 5-классында Каныкей Эралиеванын концертинде Асел Турдалиеванын "Эх, байке" деген ыры менен чыккан.

27-февралдын жылнаамасы.