Алмазбек Баатырбеков: "Казакстанда кармалган Кыргыз депутаты аткезчилердин башында турган деген маалыматка ишенбейм"

Жогорку Кеңештин "Кыргызстан" фракциясынын лидери Алмазбек Баатырбеков Казакстанда кармалган депутат Дамирбек Асылбек уулу боюнча тараган маалыматтар боюнча комментарий берди. Депутат SUPER.KG порталынын суроолоруна жооп берип жатып, Асылбек уулу боюнча жарыяланган маалыматтарга ишенбей турганын айтты.

"Казак тарап тергөөнү жашыруун иш деп коюп, ошол эле учурда өздөрүнө ылайык келген маалыматтарды чыгарганы жакшы нерсени көрсөтпөй жатат. Биринчи кине коюш үчүн соттун чечими чыгышы керек. Буга чейин Казак жараны деген маалымат чыгып келген, кечээ маалыматтар такталып, ата-энеси чыккандан кийин эми бул ишти башка тарапка буруп жатышат. Бул маалыматтарды ошол органдар колдон келсе тергөөдөн кийин айтса болот эле.

Биз Дамирбектин, ата-энесинин жашоо-шартын жакшы билебиз, ал андай топтун башчысы болгондо башкача жашамак. Асылбек Дамирбек уулу аткезчилердин башында турган деген маалымат жалган экенине мен адам катары 100 пайыз ишенем. Болгону туура маалымат чыгарыш керек деген ойдомун. Мен бардык журналисттерден суранарым: колдон келишинче соту болгонго чейин кине койгондон алыс болсоңуздар", - деди Баатырбеков.

Эл өкүлү буга чейин Казакстанга кайрылуу жиберилгенин айтты.

"Буга чейин биз фракция тарабынан мыйзам чегинде эл аралык нормаларды, адам укугун сактоо менен тергөө жүргүзсөңөр деп кайрылуу жасаганбыз.Төрага Дастанбек Жумабеков да бул боюнча жалгыз эле Асылбек уулу эмес, кошо кармалган жарандар менен депутаттык комиссия барса жолугушуу уюштуруп берүү жагын суранган", - деди Баатырбеков.

Эске салсак, 19-февраль күнү Казакстандын Башкы прокуратурасы аталган өлкөнүн чек арага жакын аймагында контрабанда менен шугулданган уюшкан кылмыштуу топторго каршы аракетти күчөтүү, бажыга байланыштуу тармагындагы укукка каршы ишмердүүлүктү токтотуу максатында атайын операция жүргүзүлгөнүн билдирген. Жыйынтыгында 35 шектүү адам кармалып, анын ичинде 3 Кыргыз жараны бар. Анын бири - Жогорку Кеңештин депутаты Дамирбек Асылбек уулу экендиги тастыкталган. Кармалгандар Кытайдан Казакстанга, ошондой эле Кытайдан Кыргыз мамлекети аркылуу Казакстанга көмүскө схемалар жана жасалма документтер менен товар киргизүүгө шектелип жатышат.