Жүк ташыган айдоочулар коому: "Жолду сапатсыз салышып, талкаланса бизге шылтап коюуну адат кылышты"

Өлкөдөгү жолдор сапатсыз салынып жатат. Мындай пикирин бүгүн, 27-февралда "Кыргыз хово транспорт" коомдук бирикмесинин өкүлү Азамат Түркмөнов маалымат жыйында билдирди.

"Негизи жолду сапаттуу сала албай жатышат. Бишкектен эле бир-эки жерди мисал катары айтып берейин. Өткөн жылы жаңы эле оңдоп-түздөлүп бүткөн Щербаков көчөсү азыр жарылып, чөгүп кетти. Ал салынып жатканда да биз кандай салынганын көргөнбүз. Жол салуунун технологиясын сактабай салышат. Жолдор бузулганда эле жүк ташуучу унаалар бузуп жатат деп жаманатты кылышат. Совет менен Чыңгыз Айтматов көчөлөрүнөн Howo унаалары жүрбөйт, ал жактар деле талкаланып жатпайбы", - дейт Азамат Түркмөнов

Маалымат жыйын "Кыргыз хово транспорт" коомдук биримесинин өкүлдөрүнүн катышуусунда өттү. Анда алар өлкө ичиндеги жүк ташыган унаалар 10 тоннадан жүк ташый турганын айтып, бул көрсөткүчтү 25 тоннага жогорулатуу үчүн кайрылуу жасашты.

Мындан сырткары эгер көрсөтүлгөн 10 тоннадан ашык жүк ташууга уруксат берилбесе, анда жүк ташуунун акысы көтөрүлөт. Андай учурда көмүрдүн жана башка каражаттардын баасы кымбаттап кетерин бирикменин жетекчиси Абасбек Доромбаев айтты.

"Ховолордун техпаспортунда 25 тонна көрсөтүлгөн, а бизге 10 тоннадан ашык жүктөгөнгө тыюу салынган. Биз машинанын документинде көрсөтүлгөн нормада жүк ташууга уруксат алгыбыз келет. 25 тонна жолдорго күч келтирбейт. Жолдорго күч келтирип жаткандар 40 тоннадан жүктөп алгандар", - деди Доромбаев

"Кыргыз хово транспорт" коомдук бирикмеси өлкө ичиндеги жүк ташуучу кызматтарды аткарат.