Кыргызгидромет: "Европа өлкөлөрүндө алдыңкы 4 күнгө болжолдонуп жаткан катуу суук Кыргыз өлкөсүндө болбойт"

Кыш мезгили аяктап баратканына карабай Европа өлкөлөрүн катуу суук каптайт. Чет элдик маалымат булактарынын синоптиктердин билдирүүсүнө таянып жазганы боюнча, алдыда 4 күн бою калың кардын жаашы, жолдордун тоңголок тайгак болушу күтүлүүдө. Мындан улам транспорттук жана авиакаттамдардын жүрүшүнө чектөө киргизилип, мобилдик байланыштар, электр энергиясын берүү үзгүлтүккө учурайт.

Чет элдик басылмалардын билдирүүсүндө бул суук Сибирден келди. Мындан улам өлкө бийлиги жергиликтүү тургундарга алдын ала эскертүүлөрдү берип жатат. Аптанын жарымында жааган кар 20 сантиметрге жетет.

Мындай суук азыркы күндөрдө Италияда катталып, сууктун күч алышына байланыштуу борбордук мектептердеги билим берүү, бала бакчалар убактылуу жабылган. Ал эми Туринде боло турган "Ювентус"-"Атланта" футболдук беттеши да кийинкиге калтырылган.

Ал эми Кыргызгидрометтин алдын ала берген маалыматы боюнча, 2-3-мартта Кыргыз өлкөсүнүн бардык аймактарында жаан жаап, айрым тоолуу аймактарда кар жаайт. Туруксуз аба ырайы 5-марттан тарта өзгөрүп, күн жылыйт. Абанын температурасы түнкүсүн +5 градус, күндүзү +12 градуска чейин көтөрүлөт.