Дарыгер: "Өзгөндөгү мечитте бычактан жаракат алган жарандын абалы туруктуу"

Ош облусунун Өзгөн районунда намаз учурундагы жаңжалда бычактан жаракат алган жарандын абалы туруктуу. Бул тууралуу бүгүн, 28-февралда SUPER.KG порталына Ош облустук ооруканасынын дарыгери Жоомарт Сарыбаев билдирди.

Анын айтуусуна караганда, бычактан жаракат алган 40 жаштагы жаран ооруканага 26-февралда саат 16:30дар чамасында келип түшкөн.

"Анын абалы туруктуу, ага алгачкы хирургиялык жардамдар көрсөтүлдү. Ал 2 жерине, ийинине жана бетине курч нерсе менен жаракат алган", - дейт дарыгер.

Айта кетсек, буга чейин Ош ОИИБинен Өзгөн районунун Красный Маяк айылындагы мечитте эки адам жаңжалдашып, бири бычактан жаракат алганын кабарлашкан.