Малика Дина: "Учурда жүрөгүмдүн ээси бар, качан турмушка чыга турганымды убакыт көрсөтөт"

Эске салсак, суроолор редакция тарабынан иргелет. Мааниси окшош, кайталанма суроолор эфирге чыгарылбайт.

15:00 Ырчы Малика Дина SUPER.KG`нин Түз эфирине кечигүүдө.

15:30 Малика Динанын Түз эфирдеги маеги башталды. Ырчы кечигип калуусуна жолдогу унаа тыгыны себеп болгонун айтып берди.

Суроо: "Малика,14-февралды Алматы шаарында тосконуңду көрүп калдык, сыр болбосо ким менен тостуң?"

Жооп: "Сыр эмес, Алматыда досторум көп. Ошолор менен чогуу тостум. Алардын арасында казак актёру Еркебулан Токтар да болду".

15:38 Окурмандын "кызың бала бакчага барабы?" деген суроосуна, "кызым бала бакчага барбайт, аны апам тарбиялайт. Менимче, апамдан тарбия алганы алда канча жакшыраак" деп жооп берди.

15:41 Ырчы казак актёру Еркебулан Токтар менен жакшы дос экендигин, экөөнүн ортосунда сүйүү мамилеси жоктугун айтты.

15:43 "Кызыңдын атасы аны көргөнгө келип турабы жана ага каржы жактан жардам берип турабы?" деген суроого, "жок, келбейт жана каржы жагынан жардамдашпайт. Кызым "папа" деп атасын издеп турат", - деп жооп берди.

15:45 "Азыр көпчүлүк адамдар жарандык никеде жашаганы менен, ортолорунда нике бар. Сөзсүз түрдө чоң той берүүнүн кажети жок, эң негизгиси эки тараптын тең жакындары колдоп, никеге туруу зарыл", - дейт ырчы жарандык нике тууралуу.

15:47 Окурмандын "Турмушка чыгып ажырашкан туурабы же сүйүктүүңдү жолуктурганга чейин күйөөгө тийбей турган жакшыбы?" деген суроосуна, "Албетте, күтүү туура. Себеби "бул ажырашкан кыз" деген сөздөн көрө, "и-ий, ушул кызды турмушка бериш керек эле" деген сөз артык", - деп жооп берди.

15:50 Ырчы алып баруучу даярдаган оюнга активдүү катышууда.

15:54 "Мен кичинемден бери балдар менен көбүрөөк достошуп келем. Андыктан досторумдун арасында кыздардын саны аз", - дейт ырчы.

15:55 "Чынын айтсам кызымдын шоу-чөйрөсүнө аралашуусун эмес, офисте отуруп иштеген кызматкер болуусун каалайм. Бирок өзүнүн каалоосу болсо, чек коюуга укугум жок", - деди ырчы.

15:57 "Мен бой жеткендиктен апам экөөбүз эки бөлөк жашоону чечкенбиз. Бирок жашаган жерибиздин аралыгы 5-6 эле көчө. Кызым 15 күн менде, 15 күн апамда болот", - дейт Малика Дина.

16:00 Суроо: "Шайыр Касымалиеванын кызы, аталаш эжеңиз Мээрим менен катташасызбы?"

Жооп: "Ооба, кичинемден бери катташып келем. Мамилебиз абдан жакшы. Мүнөзүбүз да окшош, дайыма сырдашып турабыз. Ал эми өзүмдүн бир тууган эжем Мэри Дина өтө эле токтоо, ал экөөбүздүн мүнөзүбүз таптакыр окшошпойт".

16:04 Суроо: "Келечектеги жолдошуң кандай болуусун каалайсың?"

Жооп: "Албетте, мен дагы бактылуу үй-бүлөлөрдүн катарын толуктагым келет. Келечектеги жолдошум мени түшүнгөн инсан болуусун каалайм. Себеби бири-бирин түшүнбөгөн адамдар чогуу болушса, баары бир жашап кете алышпайт экен. Учурда мени түшүнгөн жүрөгүмдүн ээси бар. Качан турмушка чыга турганымды убакыт көрсөтөт".

16:08 "Чет өлкөлүк кароо-сынактарга катышууга оюң барбы?" деген суроого, "Пландарым өтө чоң. Азыр продюсерим менен бул жөнүндө ойлонуп жүрөбүз. Буюрса, ал күн да алыс эмес", - деп жооп берди.

16:12 Ырчы өзүнө жаккан суроо жазган окурманга белегин таштап, жалпы окурмандарга арнап "Жаным" чыгармасын аткарып берди.

16:15 Ырчы Малика Динанын Түз эфирдеги маеги соңуна чыкты.