Бишкек-Ош жолуна кар көчкү түшүп жолду жаап калды

Бүгүн, 28-февралда саат 13:30дар чамасында Бишкек-Ош жолунун 260-чакырымында (Токтогул районундагы Элик тилкеси) кар көчкү түшүп жолду жаап калды. Бул тууралуу Өзгөчө кырдаалдар министрлигинин маалымат кызматынан кабарлашты. Жолду кардан тазалоо үчүн 1 бульдозер, 1 жүктөгүч, 1 КамАЗ тартылды. "Алдын ала алынган маалыматтар боюнча жабыркагандар жана каза болгондор жок. Учурда жолду тазалоо иштери жүрүп жатат", - деп билдиришти ӨКМдан.

Ошондой эле саат 13:30дар чамасында Чаткал районундагы Красная-Горка-Ак-Таш унаа жолунун Ак-Таш тилкесинде 200 метр куб кар көчкү, Ала-Бука-Жаңы-Базар-Кировка унаа жолунун Кызыл-Бел тилкесинде көлөмү 200 метр куб кар көчкү түшкөн. Мындан улам жолдор убактылуу жабылган. Жолдорду кардан тазалоо үчүн керектүү техника тартылды.