Жанар Акаевдин сынына "Кыргыз темир жол" ишканасы жооп кайтарды

"Кыргыз темир жол" ишканасында эч кандай мыйзам бузуу иштери жок", - деп бүгүн, 1-мартта SUPER.KG порталына аталган ишкананын басма сөз катчысы Эркин Каимов билдирди.

Анын айтымында, бардык иш өз нугунда мыйзамга ылайык аткарылып жатат.

"Мыйзамдуу жол менен тендерден утуп алган казакстандык компания менен келишим түзүлгөн. Алар 150 вагон менен камсыз кылып беришмек. Бүгүнкү күндө 60 вагон жөнөтүштү. Биз аны түштүк жергесиндеги ишкерлерге таратып бердик. Дагы 30 вагон келе жатат. Калган 60 вагон 1-апрелге чейин бизге келип түшөт. Эч кандай макулдашуу бузулган жок. Вагондордун кеч жөнөтүлүшү боюнча компания 2-февралда кат жүзүндө түшүндүрмө берген. Казакстандагы сууктан улам техникалык процесстер үзгүлтүккө учурап, келишимдеги мөөнөткө чейин ишти бүтүрүүгө жетишпей калышкан. Келишимде мөөнөтүнөн кечиктирсе айып пул төлөнөт деген жери бар. Бирок биз өнөктөш катары түшүнүү менен кабыл алдык", - деди Каимов.

Эске салсак, бүгүн, 1-мартта Жогорку Кеңештин жыйынында депутат Жанар Акаев "Кыргыз темир жолу" ишканасында мыйзам бузуулар көп экенин, коррупциялык шек жараткан бир канча маселелерди белгилеген.

"Кыргыз-Орус өнүктүрүү фондунан 8 миллион 380 миң сом насыя алган. Ага ылайык, январдын аягына чейин 150 вагон иштеп башташы керек болчу. Бүгүнкү күнгө чейин вагондор келе элек. 40 вагон келди, анын 10го жакыны азыркы талапка жооп бербеген эски тетиктер менен келген. 40 вагон тең тендердин талаптарына жооп бербейт. Менин колумда башкы инженердин колу коюлган тастыктоочу документтер турат. Бул вагондорду ортомчу казак фирмасы аркылуу сатып алуу келишими түзүлгөндө эле күмөн жаралган. Ушул күнгө чейин Жалал-Абадга вагондор толук жеткириле элек. Качан жеткирилет белгисиз. Келишимди аткарбаган тарап айып пул төлөш керек болчу. Ишкананын жетекчилигинин шалаакылыгынан улам казак фирмасына азыркы күнгө чейин айып пул салына элек. Бул жерде коррупциялык макулдашуулар көрүнүп турат", - деген Акаев.