Орусия Кышкы Олимпиадада ийгилик жараткан спортчуларын BMW үлгүсүндөгү унаалар менен сыйлады

Орусиянын премьер-министри Дмитрий Медведев Пйоңчаңда өткөн Кышкы Олимпиада оюндарында ийгилик жараткан спортчуларга BMW үлгүсүндөгү машиналарды тапшырды. Бул тууралуу орусиялык басылмалар жазып чыгышты.

Маалыматка ылайык, жаңы унаалардын ачкычына 46 спортчу ээ болду. Анда алтын медалдарды ээлеген спортчулар BMW X6, күмүш медалдын ээлери BMW X5 жана коло медалдын ээлери BMW X4 унаалары менен сыйланышты. Олимпиадада жакшы жетишкендиктерди көрсөткөн орусиялык спортчулар 2006-жылдан баштап мамлекеттен унааларды белекке алышат.

2016-жылда өткөн Олимпиада оюндарында медаль утуп алгандар BMW X6, X4 жана X3 унааларына ээ болсо, 2014-жылы өткөн Кышкы Олимпиада оюндарынын медалдарынын ээлери Мерседес-Бенц унааларына ээ болушкан.

9-25-февраль аралыгында Түштүк Кореянын Пйоңчаң шаарында өткөн Кышкы Олимпиада оюндарында орусиялык спортчулар Эл аралык олимпиада комитетинин желегинин алдында катышкан. Алар мелдештин жыйынтыгында 2 алтын, 6 күмүш жана 9 коло медаль жеңип алышты.

Эске салсак, орусиялык спортчулардын допинг текшерүүсү таза чыгып, Орусия автоматтык түрдө кайрадан Эл аралык олимпиада комитетинин мүчөсү болгон.