Депутат Казакбаев сүйүнчү пул берүүнүн жолун жеңилдетүү керектигин айтты

“Республика-Ата Журт” фракциясынын лидери Руслан Казакбаев сүйүнчү пул берүүнүн жолун жеңилдетүү керектигин айтты. Бул тууралуу ал бүгүн, 2-мартта аталган фракциянын жыйынында билдирди.

“Мыйзамдын аткарылышына мониторинг жүргүзүү зарыл. Ошондо мыйзам сапаттуу аткарылып баштайт. Биринчи кезекте жөлөк пулдар жөнүндө мыйзамга өзгөртүү киргизүүдө каржы булактарды аныкташ керек. Каржы булагы болбой туруп жөлөк пул жөнүндө мыйзамга өзгөртүү киргизсек талаш-тартыш жаратат. Жөлөк пулдар боюнча маселе татаал болуп жатат. Бир топ маалым кат, аныктама, чиновниктердин артынан чуркамай коррупциялык көрүнүштөр жаралып жатат. Мисалы, депутаттар Бишкектин Октябрь районунда кечээ телефон чалып сурамжылоо жүргүздүк. Сүйүнчү пул алуу үчүн 35 жаран кайрылыптыр. Бирок 4 гана жаранга сүйүнчү пул берилген. Карапайым элден сурасак дагы эле коррупциялык көрүнүштөр бар экен. Айыл жеринде жашагандар райондорго барып документтерин берүүгө туура келет. 4 миң сом алуу үчүн канча жол кире кетет? Өкмөт сүйүнчү пул берүүнүн жолун жеңилдетиши керек”, - деди Руслан Казакбаев.

Жыйында жөлөк пулдар жөнүндө мыйзамдардын аткарылышы тууралуу маселе каралып жатат.