Бутундагы протезин алмаштыруу үчүн Орусияга барган Кыргыз жараны аэропорттон мекенине кайтарылды

Орусиянын аймагына кире албай Санкт-Петербургдагы "Пулково" аэропортунда жашап жаткан О.Моминов аттуу Кыргыз жараны мекенине кайтарылды. Бул тууралуу SUPER.KG'ге Кыргыз мамлекетинин Орусиядагы элчилигинен кабарлашты.

Маалым болгондой, 27-февраль күнү Моминовдун эжеси Кыргыз мамлекетинин Санкт-Петербургдагы консулдугуна кайрылып, иниси Орусиянын аймагына кире албай жаткандыгы үчүн жардам берүүнү өтүнгөн. Бир күндөн кийин элчилик Моминовдун жакындары жана аэропорттогу чек арачылар менен байланышкан. Чек арачылар Кыргыз жараны Орусияга келүүдөгү максатын так түшүндүрө албай жаткандыгын жана жанында жетиштүү акча каражаты же кепилдик бар экендигин көрсөтүүсү керектигин түшүндүргөн.

Кийин Кыргыз мамлекетинин миграциялык кызматынын Санкт-Петербургдагы өкүлчүлүгү ал жаран Орусиянын "кара тизмесинде" жок болгонун, ага тыюу салууга эч кандай негиз жоктугун аныктап чыккан.

Мындан улам элчилик чек арачылардын аракети боюнча расмий түшүндүрмө алуу үчүн тийиштүү нота даярдашкан болчу. Бирок элчилик Кыргыз жараны 28-февраль күнү кечинде туулган жерине кайтарылганын айтты.

Маалым болгондой, Кыргыз жараны Орусияга бутундагы протезин алмаштыруу үчүн барган. Анын эжеси маалымат каражаттарына иниси бир жыл бою дарылануу үчүн каражат топтогонун айтып берген. Ден соолугунун мүмкүнчүлүгү чектелген жаран 30 миң рубль топтоп алып, дарылануу үчүн сапарга аттанган.