Балбан Базар Базаргуруевге 2008-жылы өткөн Олимпиада оюндарынын коло медалы тапшырылды

4-мартта Бишкек шаарындагы Каба уулу Кожомкул атындагы спорт ордосунда улуттук олимпиадалык комитет балбан Базар Базаргуруевге 2008-жылы өткөн Олимпиада оюндарынын коло медалын тапшырды.

Сыйлыкты улуттук олимпиада комитетинин башкы катчысы Саламат Эргешов тапшырды. Ошондой эле Жаштар иштери, дене тарбия жана спорт агенттигинин директору Канат Аманкулов акчалай сыйлык тапшырды. Базар Базаргуруевге 2 миллион 209 миң 312 сом ыйгарылса, анын машыктыруучусу Анарбек Усенканов 552 миң 328 сомго ээ болду.

Эске салсак, эл аралык Олимпиада комитети 2017-жылы украиналык Василий Федоришиндин канында допинг табылгандан улам анын ийгиликтерин жокко чыгарган. Буга байланыштуу анын 2008-жылы Пекинде өткөн Олимпиада оюндарында жеңип алган күмүш медалы япониялык спортчуга, ал эми коло медаль Кыргыздын атынан күрөшкөн Базар Базаргуруевге ыйгарылган.