"Достук" өткөрүү пунктун кеңейтүү үчүн Кыргыз мамлекети 32 турак үйдү сатып алды

Кыргыз-Өзбек чек арасындагы “Достук” өткөрмө бекетин кеңейтүү үчүн Кыргыз мамлекети 32 турак үйдү сатып алды. Бул тууралуу вице-премьер-министр Дайыр Кенекеев 3-мартта аталган пункттагы абалды текшерүү үчүн барганда билдирген.

Маалыматка ылайык, дагы үч турак жай боюнча соттук териштирүүлөр жүрүүдө. Мындан тышкары жолду кеңейтүү пландаштырылып "Достук" чек ара тилкесине алып баруучу жол жээгинде курулган турак жай жана башка курулуштардын мыйзамдуулугу боюнча текшерүү жүргүзүүнү тапшырган.

Эске салсак, чек ара кызматынын өкүлдөрү "Достук" көзөмөл-өткөрүү жайындагы элди тейлөөгө өткөрмө кабиналардын жетишсиздиги тоскоол болуп жатканын билдирген. Мамлекеттик чек ара кызматынын төрагасы Уларбек Шаршеев 3-марттан тартып кошумча төрт кабина коюлганын да айткан.