Депутат: "Транспорт жана жолдор министрлиги бюджеттин канын соргон, эң коррупциялашкан мекемеге айланды"

Бүгүн, 5-мартта Жогорку Кеңештин Бюджет жана финансы комитетинин жыйынында депутат Сайдулла Нышанов өткөн жылы салынган жолдор бир жылда жарактан чыгып калганына тынчсызданып жатканын билдирди. Ал жол курулуштарында эрежелер сакталбай жатканын айтты.

"Өткөн жылы курулган жолдор бир жыл болбой талкаланып калды" деп азыр бүт маалымат каражаттары жарыялап жатат. Буга ким жооп берет? Азыр куруучулар сапатка көңүл бурбай жатат. Биздеги Транспорт жана жолдор министрлиги менен Архитектура, курулуш жана турак жай-коммуналдык чарба мамлекеттик агенттиги бюджеттин канын соргон, эң коррупциялашкан мекемелерге айланды", - деди Нышанов.

Ал эми Транспорт жана жолдор министрлигинин статс-катчысы Эрмек Мамыркалиев бул боюнча маселе бар экенин жашырган жок.

"Мындай маселе бар. Учурда министрлик бул тармакта иш алып барууда", - деди Мамыркалиев.