Алмамбет Шыкмаматовдун иши карала турган соттук отурум 13-мартка жылдырылды

Жогорку Кеңештин депутаты Алмамбет Шыкмаматовдун иши карала турган соттук отурум 13-мартка жылдырылды. Бул тууралуу бүгүн, 5-мартта жактоочусу Чынара Жакупбекова билдирди.

"Бүгүн, 5-мартта Бишкек шаардык сотунда отурум уланмак, бирок Алмамбет Шыкмаматов ооруп ооруканада жатат. Ага байланыштуу абалы жакшы болуп калганга чейин ишти кароону убактылуу токтото туруу боюнча сотко өтүнүч келтирдик. Бирок сот биздин өтүнүчүбүздү четке кагып, отурумду 13-мартка чейин убактылуу гана жылдырды", - дейт жактоочу.

Белгилей кетсек, "Алмамбет Шыкмаматов 2011-жылы Эсептөө палатасынын аудитору болуп турганда жеке кызыкчылыгын көздөп, аялынын Мерседес Бенц Е320 үлгүсүндөгү унаасын кымбат баага сатуу үчүн "Барат Люкс" ишканасын тендерге катышкандардын катарына кошууну демилгелеген" деп айыпталууда. Биринчи инстанциядагы сот иши Биринчи Май райондук сотунда каралып, 19-декабрда Алмамбет Шыкмаматовго, Эсептөө палатасынын мурдагы аудитору Жусуп Иманалиевге жана Германиянын Кыргыз мамлекетинде жашаган жараны Али Юкселге өкүм чыгарылган.

Соттун чечимине ылайык, Шыкмаматов 5 миллион сом айыпка жыгылган. Иманалиев 10 жыл 6 айга күчөтүлгөн тартипте эркинен ажыратылып, мүлкү конфискацияланып, эркиндикке чыккандан кийин 3 жыл мамлекеттик жана муниципалдык кызматта иштебейт. Ал эми алар менен бирге айыпталып жаткан Юксел жазадан бошотулган. Шыкмаматов соттун мындай чечимине каршы экенин билдирип, Бишкек шаардык сотуна кайрылган.