Ош ШИИБи: "55 жаштагы адам аялына карыз алып бергени үчүн балдызын базардын ичинде бычактаган"

Ош шаарындагы базарлардын биринде "майда манты" сатып жаткан келинди бычак менен сайып качып кеткен жездеси кармалды. Бул тууралуу бүгүн, 5-мартта SUPER.KG порталына Ош ШИИБинин басма сөз кызматынан билдиришти.

Алардын айтуусуна караганда, мындай кадамга шектүү 29 жаштагы балдызынан өч алуу максатында барган.

"Окуя 4-март күнү 12:30дар чамасында борбордук базарда орун алган. Анда 29 жаштагы Ош шаарынын Д. А. аттуу тургунун бирөө аркасынан келип, жамбашына бычак сайып качып кеткен. Арадан 10 мүнөт өтпөй эле базардын аймагынан 55 жаштагы Ж. К. аттуу Ош шаарынын тургуну кармалган. Кийин кармалган адам жабырлануучунун жездеси экени аныкталды.

Сурак учурунда шектүү кылмышты толук моюнуна алды. Жаракат алган балдызы ортого түшүп, анын аялына ири суммадагы карыз акча алып берген экен. Аялы карызды кайтаруу үчүн Орусияга иштегени кетип, бул ишке кириптер кылган балдызынан өч алуу үчүн ушундай кадамга барган", - деп билдиришти басма сөз кызматынан.