Бишкек ЖЭБди оңдоодогу уурулук фактысы боюнча кармалган "Электр станциялары" ишканасынын кызматкери Бердибек Боркоев 2 айга камакка алынды

Бишкек ЖЭБди оңдоодо уурулук фактысы боюнча кармалган "Электр станциялары" ишканасынын жетекчисинин мурдагы биринчи орун басары Бердибек Боркоевдин баш коргоо чарасы каралып, 2 айга камакка алынды. Бул тууралуу Улуттук коопсуздук мамлекеттик комитетинин басма сөз кызматы кабарлады.

Маалыматка ылайык, Бердибек Боркоевдин баш коргоо чарасы бүгүн, 5-мартта Бишкек шаарынын Биринчи Май райондук сотунда каралып, аны 2 айга камакка алуу чечими чыгарылган.

Айта кетсек, буга чейин УКМКдан Бишкек ЖЭБди оңдоодо ири суммадагы уурулук фактылары аныкталганын, ага байланыштуу "Электр станциялары" ишканасынын жетекчисинин мурдагы биринчи орун басары Бердибек Боркоевдин кармалганын кабарлашкан.

Бердибек Боркоев кызматынан ушул жылдын 6-февралында бошотулган. 19-февралда өкмөт үйүндө ЖЭБдеги авариянын себептерин иликтеген өкмөттүк комиссиянын жыйынында кызматтан алынгандардын катарында Боркоевдин да аты аталган болчу.