УКМК 2 жыл ичинде мамлекетке 217 миллион сом зыян келтирген деп айрым бажы жана салык кызматкерлерине иш козгоду

УКМК 2 жыл ичинде мамлекетке 217 миллион сом зыян келтирген деп айрым бажы жана салык органдарынын кызматкерлерине, Экономика министрлигинин айрым кызматкерлерине иш козгоду. Бул тууралуу 6-мартта Мамлекеттик улуттук коопсуздук кызматынын басма сөз кызматынан маалымдашты.

Маалыматка ылайык, ыкчам иликтөө иштеринин жыйынтыгында коррупциялык схеманын негизинде бюджеттик казынадан ири суммадагы каражат чыгарылып кеткендиги белгилүү болгон. Тактап айтканда, айрым юридикалык фирмалар Кытайдан импорттолгон товарларга кошумча нарк салыгын ашыкча төлөп алгандыгы тууралуу жалган документтерди жасап, салык органдарына берип турушкан. Факты түрүндө кошумча нарк салыктары төлөндү делген товарлар ири соода комплекстердеги ишкерлерге тиешелүү болгон жана алар өздөрүнүн товарларын алып келүүдө бажы жана салык төлөмдөрүн толук түрдө төлөп келишкен.

Коррупциялык схеманын негизинде ал юридикалык фирмалар 2016-жылдан 2018-жылдын башына чейин мамлекеттен 217 миллион сом каражатты мыйзамсыз кайтарып алышкан. Учурда УКМК тарабынан салык жана бажы кызматтарында ыкчам иликтөө иштери жүрүүдө.