Ырчы Анжелика Бекболиеванын ажырашуу тууралуу жазган арызы боюнча соттук отурум 12-мартка жылдырылды

Ырчы Анжелика Бекболиеванын жолдошу Урмат Бекболиев менен ажырашуу боюнча жазган арызынын негизиндеги соттук отурум 12-мартка жылдырылды. Бул тууралуу Жогорку Соттун басма сөз кызматы билдирди.

Ал эми ырчынын өзү менен байланышсак, учурда жумуштары менен жүргөнүн айтты. "Мен азыр съёмкадамын. Бүгүнкү сот отуруму башка убакытка жылдырылмак. Ишти менин атымдан барган өкүл алып барат", - деди ал.

Эске салсак, Бекболиеванын ажырашуу тууралуу декабрь айында жазган арызы бүгүн, 6-мартта Биринчи Май райондук соту тарабынан каралмак.

Биринчи соттук процесс 2017-жылдын 20-декабрына белгиленип, ага Урмат Бекболиев келбей койгонуна байланыштуу кезектеги соттук кароо 29-январга белгиленген. Бирок Биринчи Май райондук соту соттук отурум белгисиз мөөнөткө жылдырылганын билдирип, анын себебин түшүндүрүүдөн баш тарткан.

Айта кетсек, ырчы жеке ишкер Урмат Бекболиевге 2006-жылы турмушка чыккан. 10 жылдан ашык түтүн булаткан түгөйлөр 3 кыздуу болушкан. Ырчы SUPER.KG порталына 11 айдан бери жолдошу менен чогуу жашабай калганын билдирген.