Казакстанда кармалган депутат Дамирбек Асылбек уулу дарылануу үчүн башка бөлүмгө которулду

Казакстанда кармалган Жогорку Кеңештин депутаты Дамирбек Асылбек уулу дарылануу үчүн медициналык бөлүмгө которулду. Бул тууралуу 6-мартта Кыргыз мамлекетинин Акыйкатчы институтунун басма сөз кызматы билдирди.

Маалыматка ылайык, акыйкатчы Кубат Оторбаевдин Казакстанда камакта жаткан Дамирбек Асылбек уулу жана аны менен кошо кармалган эки Кыргыз жаранынын укуктарынын сакталышы жөнүндөгү катына Казакстандын акыйкатчысы Аскар Шакиров өз жообун жөнөттү.

"Кармалган жарандар Алматы шаарындагы Жазаларды аткаруу департаментинин ЛА-155/1 жайында экени кабарланды. Казак прокуратурасынын өкүлдөрү медициналык документтерди карап, өнөкөт панкреатит дартынан улам Дамирбек Асылбек уулунун медициналык бөлүмгө которулганын билдиришкен. Ошондой эле тергөө абагында бардык шарттар аткарылгандыгы жана эч кандай адам укуктары бузулбагандыгы айтылды", - деп жазылат маалыматта.

Эске салсак, 19-февраль күнү Казакстандын Башкы прокуратурасы аталган өлкөнүн чек арага жакын аймагында контрабанда менен шугулданган уюшкан кылмыштуу топторго каршы аракетти күчөтүү, бажыга байланыштуу тармагындагы укукка каршы ишмердүүлүктү токтотуу максатында атайын операция жүргүзүлгөнүн билдирген. Жыйынтыгында 35 шектүү адам кармалып, анын ичинде 3 Кыргыз жараны бар. Анын бири - Жогорку Кеңештин депутаты Дамирбек Асылбек уулу экендиги тастыкталган. Кармалгандар Кытайдан Казакстанга, ошондой эле Кытайдан Кыргыз мамлекети аркылуу Казакстанга көмүскө схемалар жана жасалма документтер менен товар киргизүүгө шектелип жатышат.