Бишкек ШИИББи: "Бишкекте 60тан ашык кыз онлайн порнокызматын көрсөтүп келген"

Бишкек шаардык милициясы интим кызмат көрсөткөндөр боюнча иликтөө иштерин улантып жатат. Бул тууралуу Бишкек шаардык ички иштер башкармалыгынын басма сөз кызматы билдирди.

Маалыматка караганда, ушул жылдын башынан бери 119 кызды каттоого алышкан, алардын ичинен 64 кыз интернет аркылуу интим-кызматынын жеңил түрүн көрсөткөндүгү аныкталган. Ушул жылдын башынан бери Бишкек шаарында онлайн интим кызматын көрсөткөн эки факт катталып, кылмыш иши козголгон.

Биринчи Май райондук ички иштер башкармалыгы тарабынан уюштурулган профилактикалык иштерди жүргүзүү учурунда Бишкек шаарында интернет аркылуу виртуалдык төшөк кызматын көрсөтүүгө үндөгөн студиялар бар экени жөнүндө арыз түшкөн.

Ыкчам иликтөө иштеринин натыйжасында, кыздарды онлайн интим кызматын көрсөтүүгө үндөп жүргөн тараптар аныкталып, бул ишке шектүү катары эки адам колго түшүрүлдү.

Учурда кармалган жарандарга карата кылмыш иши козголуп, тергөө иштери уланууда. Кармалган жарандар соттун чечими менен убактылуу кармоочу жайга 2 айга камакка алынган.