"ПСЖ" - "Реал Мадрид". Падышалык клуб Чемпиондор Лигасын 3-ирет утууга дагы бир кадам жакындады

7-мартка караган түнү Бишкек убактысы боюнча саат 1:45те Чемпиондор Лигасынын бүйүр кызыткан оюндарынын бири париждик "ПСЖ" футболдук командасы менен Мадрид шаарынан келген "Реал Мадриддин" ортосунда болду. Бул оюн 1/8 финалдык оюндардын чечүүчү оюну, 2 оюндун жыйынтыгында ким жеңишке жетсе кийинки баскычка өтөт.

Далайлардын кызыгуусун арттырган оюн башталды. Бул оюнда париждиктердин ишенимдүү оюнчуларынын бири Неймар майданга жаракатына байланыштуу чыга алган жок. Биринчи оюн 3:1 эсебинде падышалык клуб болгон "Реал Мадриддин" пайдасына чечилгендиктен алар чабуул жасоого шашылган жок. Мурунку оюнда утулуп жана өз үйүндө ойноп жаткан ПСЖ жааты деле гол согууга ашыккан жок. Оюндун ыргагы бир калыпта жүрүп жатты. Биринчи бөлүктүн орчундуу учуру, 20-мүнөттө "ПСЖ" оюнчусу Верратти орой ойноп сары айып кагазына ээ болду. Биринчи бөлүктүн 32-мүнөтүндө "Реалдын" оюнчусу Ковачич да орой оюн алып барып сары кагазга ээ болду. Топко ээлик кылуу боюнча эки жаат бирдей пайыздык көрсөткүчтө. Эсеп саны ачылган жок, оюнчулар 15 мүнөттүк тыныгууга кетишти.

Экинчи бөлүк башталып, оюн ыргагы биринчи бөлүккө салыштырмалуу жогорку деңгээлде жүрүп жатты. Оюндун 51-мүнөтүндө капталдан көтөрүлгөн топту Роналду башы менен сүзүп, эсеп санын ачты. Эсеп саны 0:1, Реал жааты алдыда. Оюн 66-мүнөтүнө келгенде кызуу кандуу "ПСЖ" жарым коргоочусу Верратти калыска орой кайрылгандыгы үчүн 2-сары кагазын алуу менен автоматтык түрдө кызыл кагаз алып жашыл майданды таштап кетүүгө аргасыз болду. Ортодон аз убакыт өтүп, 71-мүнөттө париждиктер эсепти 1:1ге айлантты, бул гол Каванинин атына жазылды.

10 оюнчусу менен оюн өткөрүү "ПСЖ" жаатына оңой болгон жок. 80-мүнөттө "Реалдын" жарым коргоочусу Каземиро узаткан сокку "ПСЖ" коргоочусунан жанып өтүп дарбазанын ичине түштү. Эсеп 1:2, жалпы эсепте 2:5, бул гол беттешке чекит койгондой элес калтырды. Калыс оюнга 4 мүнөт кошту, ышкырык жаңырды, "Парк де Пренс" стадионуна келген күйөрмандардын жана талаа үстүндөгү 10 оюнчунун маанайы суз.

Ошентип "Реал Мадрид" Чемпиондор Лигасынын 1/4 баскычына ишенимдүү түрдө кадам шилтеди. Кийинки баскычта "Реал" ким менен оюн алып бара турганы азырынча белгисиз.