Президент Сооронбай Жээнбеков Аялдардын эл аралык күнү менен куттуктады

Президент Сооронбай Жээнбеков Аялдардын эл аралык күнү менен куттуктады. Бул тууралуу бүгүн, 8-мартта президенттик аппараттын басма сөз кызматы билдирди.

"Урматтуу айымдар, жаз майрамы 8-март - Аялдардын эл аралык күнү менен чын жүрөгүмдөн куттуктайм! Сиздер өз мээримиңиздер менен жашоону көркүнө чыгарып, үйгө кут, өмүргө кубаныч алып келесиздер. Энелик сезимиңиздер, келечек муунга арналган чексиз сүйүүңүздөр жашоонун улуу көчүн улап келет. Кыргыз элинде байыртан эненин орду өзгөчө бааланып келген. Ал ыйык салт биздин коомдо дайыма аздектелип сакталат. Сиздер бүгүн өлкөнүн саясий, экономикалык, социалдык жана маданий чөйрөсүнө жигердүү катышып жатасыздар. Аялдар - жашообуздун ыйык коломтосу. Коомубуздун ынтымагына жана биримдигине сиздердин кошкон салымыңыздар баа жеткис. Сиздердин кажыбас кайратыңыздар, турмуштук активдүү позицияңыздар бизди ар дайым бийик максаттарга, зор жоопкерчиликке багыттап турат. Урматтуу асылзат айымдар, майрамыңыздар менен чын дилимден куттуктайм! Баарыңыздарга бекем ден соолук, бакубат турмуш, бакыт-таалай каалайм! Майрамыңыздар менен!", - деп жазылат куттуктоодо.